Gedankä zum «Abriss vom üsem Spital»…

I bi numä ä eifachi Frou vo 2-Simmä, bi hie d Schuel, ha aber ke «Hochschuel-Abschluss» oder süsch ä Titel, also wahrschinlich vo «Tutä u Bläsä» ki Ahnig? Derfür tuchts mi i higi ä ganz ä gsundä Mönschäverstand, u dä sit mier…

…für die gstudierte Theoretiker i de Chefsässlä ds Thun het üses «altä Spital» schinbar ä ki Wärt me, we sis ja wi abschrissä!

De weri ja das finanziell afä gar kis Problem, das mier als Region Simmental-Saanenland zämä das Objekt, sägä mer für 10 Frankä, ummi chönte zrugg erwärbä?

U när, will ja de o d «Rückbou-Chöschtä» wägfallä, chönnte si das gspartä Gäld o no grad i nes Couvert tue u derzue legä?

De weri ihres Problem glöst u si würde sogar no 30 Millionä sparä will si ja de kis nöis «Spitäli» müessä bouä.

I bi när o überzügt, dass mier zämähaftig als ganzi Region im Stand si sälber ummi zu üsem Spital ds guggä. We de scho mal die risigä «Manager-Löhn» vo denä 2 «Gsund-schrumpfi-Herrä» nimme ir Buechhaltig uftouchä!

U süsch weris de sicher o nid ds viel verlangt, we jedä Hushalt im ganzä Tal jedes Jahr äs Hunderter-Nötli spändet. (ca. Frankä 1 000 000)

We mier nämlich äso witerfahrä u, vor luter «Dollar-Ziichä» vor üsnä Ugä, ds wärtvollstä wos uf üsärä Wält git, nämlich ds «Mönschä-Läbä», nimme achtä u schetzä, de simer de i paar Jahr äso wit, dass mer müessä Klinikä uftue, wo si nes i üser Hirneni ummi ä chli Gfüel für enand müessä inni operierä!

Übrigens: i ha o 2 Chind u ds erschtä isch sogar ds Australiä uf d Wält cho u dert würde si sich d Finger läckä, we si äso äs fürnähms Spital hettä (bi mit ca 10 Frouä im Zimmer gsi)!